Über üs...

Es isch e Sunntig, der 24. Novämber 1912 gsi, e schönä Herbsttag, wo sich e stattlechi Zahl

Kavallerischte usserhalb vo Lyssach het iigfunde für nä fründschaftlechi Schnitzeljagd z veraastaltä. Us derä Schnitzeljagd isch de d Absicht entstande, e Verein z gründä. So isch der Kavallerie-Riitverein Ungeri Ämme gebore gsi…

Zu därä Zyt isch er nume us männlichä Mitglieder bestandä. Mit der Zyt hei sich de ging wie meh o

wyblechi Pfärde- & Riitsportbegeischtereti für ds Vereinsläbe afaah interessiere und sy biiträte. Mit der Abschaffig vo der Kavallerie im 1974i und der zuenähmend wybleche Beteiligung het mä de i dä späte Achtzgerjahre der Verein müässä/dörfä umbenennä: syderhär isch er ganz iifach der Riitverein Ungeri

Ämme…

Aus einä vo dä letschtä Vereinä im ZKV-Gebiet het der RV Ungeri Ämme kei Standarte, sondern es

Fähnli. Das isch d Bedingig gsi dazumau, dass die alte Kavallerischte am "Ändi" vom Kavallerie-Riitverein zuegstummä hei. Und sythär wääiit üses Fähnli immer no schön im Wind…

Üses Vereinslokal und ds Daheimä vom Fähnli isch im Restaurant Rudswilbad, im "Bedli", ds Ersigä. Dert findet o aujährlich im Februar üsi Houptversammlig statt.

D Vereinsaktivitäte umfassä es breits Spektrum a Vielfältigkeit, vom gmüetlichä Kegel- oder Bowlingabä übere fründschaftlich Wettstriit bim Minigolf bis häre zum jährlichä Schlussspringä, wo als Abschluss vor Springsaison sehr beliebt isch. So findet sech für jedä und jedi mindeschtens ei Aalass, o für Gönner- und Familiemitglieder!

 

A dreinä Sunntigä im Monet trifft mä sich bi eim vo dä umliegändä Restaurants zum gmüetlichä Kaffi oder je nachdäm bruuchts o no chlei Kurven-Öl… Und de ergit sich unger Umstände no ne gmeinsamä Heimritt, wo villicht o no ds eintä oder angerä Abentüür wartet…

Natürlich chunnt bi üs d Kameradschaft nid z churz, da drfür sorgt unger angerem e usglassene und

immer wieder interessant und abwächsligsriich organisiertä Zwöitagesritt.

Ändi April / Afang Mai i jedem Jahr organisiere mir zämä mit em Riitclub Burgdorf der wohlbekannt und spannend CS ds Burdlef uf der Schützematt, vor eirä vo dä schönschtä Kulissenä mit dä imposantä Flüeh oder o am Schloss Burdlef.

Aui Aaläss und Aktivitäte ufem Jahresprogramm wärde zur Jahresmeisterschaft zeut und ar Houptversammlig wird de der Jahresmeischter bekannt gäh, wo de e schönä Wanderpriis und e Überraschig in Empfang darf näh. Für die fliissigä Riiter wo mindeschtens 70% vo dä Aktivitäte bsuecht hei, winke Guetschiinä oder en anderi Überraschig…

 

Ds Iizugsgebiet umfasst houptsächlich d Gmeindä rund um Ersigä, Koppige, Chiuberg (Kirchberg BE), Alchenflüeh, Rüedtlige, Aeflige.

Üser Aktivitäte gfinde o zmeischt i derä Region statt.

Aktuell zeut der Verein uf 49 Aktivmitglieder, 4 Juniore, 28 Gönner, 7 Ehremitglieder und 30 Veteranä

 

um was geits bi üs...

Ursprünglich aus Kavallerie-Riitverein gründet, stöh bi üs immer no die gliichä Wärte im Vordergrund und mir legä Wärt uf d Pfleg vor Kameradschaft (o we das halt nüm so militärisch zue und här giit...) und mir verträte d Interässe vo üsem Hobby Pfärdesport i däm doch mängisch nid meh so eifache Umfäud.

 

I de "offizielle" Wort gemäss üsnä Statutä:

  • Es geit um d Förderig vom Pfärdesport i all sinä Facettä

  • d Usbildig vo Riiter und Ross
  • d Pfleg vor Kameradschaft unger dä Mitglieder
  • dr Zämeschluss vo Pfärdefründä zur Pfleg vom Pfärdesport
  • d Erhautig vo ethischä und moralischä Grundsätz gägenüber em Ross
  • ds Aahaute vo dä Mitglieder zu fairem Sport, sportlichem Verhalte und zur Rücksichtnahm uf d Umwäut
  • d Förderig vo Sympathie für sämtlechi Belangä vom Ross i wytä Bevölkerigsschichtä unger beschtmöglicher Wahrig vor Umwäut
  • d Interässeverträtig vo dä Mitglieder gägenüber Behördä, Organisatione und Gseuschaftäd
  • Zämenarbeit mit Verbänd und angernä Vereinä

wieso söui da mitmache...

Mir hei für aui Pfärdesportinteressierte (und die, wos no wei wärdä!) öppis z biete. Ungerem Jahr organisiere mir villi tolli Aaläss und jede Sunntig (ussert am letschtä vom Monet) träffe sich die wo Zyt u Luscht hei imenä Reschtorant zum gmüetlech es Kaffi zäme z näh und de villicht o no zäme dr Heimritt azträte...

Es isch auso o scho vorcho, dass sich da no ds einte oder andere Abentüür ergäh het... ;-)

Du xehsch, da louft öppis! Natürlich louft o sportlich vill: Mir biete dür d Turniersaison genauso wie zur Vorbereitig im Winter verschiedeni Kurse für alli Level ah und als Mitglied profitiersch natürlich vo däm Top Priis-Leischtigs-Verhältnis!

 

Natürlich gits no vill meh mit üs z entdeckä und z erläbe, aber das muesch am beschtä sälber erläbt ha, därum: MACH MIT! Mir fröienis uf Di!!