... wiudi Vereins-Gschichte in Foto-Form ... ;-)

 

...hie finget Dir d Foto-Bewiise vo üsnä wiudä Vereins-Gschichtä... We Dir o no Föteli heit, de löht nis die doch zuecho, dermit alli öppis zum Schmunzlä hei... :-)

2-Tagesritt vom 15. - 17. Septämber 2017...

... vom Friitig, 15. bis Sunntig, 17. Septämber 2017 het es Trüppli es herrlichs Wuchenänd im Bärner Jura, i der wunderbare Region rund um Bellelay verbracht! D Ross hei luxuriös i der wunderschönä Aalag vo der Familie Lachat logiert und mir hei sogar es Upgrade i tolli Hotel-Zimmer in Sornetan becho. WOW! Es isch rundum glungä zue und här gange und längwilig isch nis uf au Fäu nie wordä. :-) 

I wett nid zviu Wort verlierä, löh mer d Fotos für sech lah sprächä...:


Minigolf vom 16. Juni 2017...

 

... o i däm Jahr hei sich die Muetigschtä vom Verein ar Herusforderig Minigolf gsteut... I bi no hüt nid sicher, gob der Held Res nid doch e chlii bschisse het, so wenig wie mä ihn het unger Kontrolle chönne ha... ;-) Uf jede Fau het ihm das o nüt bracht, der Bigler Jörg het sich als träffsicherschts Mitglied erwiisä und die Sach konkurrenzlos gwunnä... O we ihm siner Grosschind dicht uf de Färse sy gsi... *grins*

Mir hei uf au Fäu e "ereignisriichä" Minigolf-Abe ds Gerlafinge verbracht und es het ume viu z Schmunzlä gäh... ;-)

 

P.S.: der Fred het de die Krücke scho VOR em Minigolf gha, nid dass i de da Grücht i Umluuf bringä...

 


Breakfahrt ar Uffahrt 2017...

 

... wie jedes Jahr het o hüür am Uffahrts-Donnschtig üsi traditionelli Breakfahrt stattgfunde. Leider isch soviel a däm Tag los gsi, dass mir nume es chliises Trüppli gsi sy und dass es halt hüür "nur" für 1 Break glängt het, die räschtlichä sy sportlich mit de Marathon-Wäge ungerwägs gsi. :-)

Üses Ziel isch d Hornusserhütte vo de Hornusser Grafenried gsi und ds Wätter isch bombastisch gsi, sodass mir e prächtige Sunntig gmüetlich mit feine Grillade, Salät und natürlich säubergmachte wunderbare Desserts hei dörfe gniesse!!

 

Hie es paar Impressione, wo mir aune dörfe "zuemuete", die spektalulärere gäbe mir uf Aafrag eventuell use... ;-)

 


Gländetraining Club des Habits Rouges in Salavaux 2016...

 

... amenä heissä Wuchenänd Ändi Juli 2016 hei mir dörfe ds Privileg gniesse vomenä Gländetraining uf der Privat-Piste im wunderbare Gländ vom Club des Habits Rouges in Salavaux! Der Peter Christen und der Hansjörg Bigler hei i 2 Gruppe Ross und Riiter so richtig Gluscht uf d Buschriiterei gmacht! Ds Glänze i de Ouge vo allnä Teilnähmer hani ömu vo Wytem ging gseh! :-)

 

Aber lueget säuber:

 


Kostümspringä 2014...

 

... aalässlich vor Bärner Pfärdesportwuchä sy mir iiglade xy zur 3er-Equipe am Kostümspringä... Wär nis kennt weiss, dass mer nis de nid öppe hei lah lumpe und därum als Schlümpf in Begleitig vom Gargamel gange sy... Knapp isch der Sieg fürs beschtä Kostüm nid a üs gange, aber Spass hets alleweil gmacht! :-)

Wiu mir am Friede mit denä Versprächigä uf der Packigsbiilag nid so trouet hei, hei mir Freiwillegi zum Teschtä beuftreit... Die blaui Farb isch de bis zu de Summerferie ömu o wieder wäg gsi... ;-)

 

Söfu viu seigi verrate: es git immer no Spekulatione drüber, wär dass de im Ändeffekt würklich dert uf denä Ross ghocket isch gsi... ;-)